BUTUAN CITY – Hatagan na og cash incentives ang mga drug informants sa lungsod sa Kitcharao, Agusan del Norte human gi-aprubahan sa Sangguniang Panlalawigan ang Municipal Ordinance No. 125 kondin pinaagi kini sa Community Drug Informant Incentive Program.
Gimugna ang maong programa aron mahatagan og ganti o insentibo ang mga drug informants nga makahatag og importanteng impormasyon aron mahimong basihan sa mga otoridad sa pagdakop niadtong mga namaligya ug nagasuyop og ilegal nga droga sa maong lungsod.
Tumong niini nga mapanalipdan ang mga residente sa lungsod ilabina mga kabataan batok mga dili maayong panghitabo nga posibleng mahatod tungod sa paggamit sa iligal nga droga.
Gila-umang pinaagi niini, mapugngan ang pagkuyanap sa ilegal nga druga rason nga angayan lang nga hatagan og reward ang mga drug informants aron mahunong na ang droga dili lamang sa lungsod sa Kitcharao apan sa tibook probinsya.
Ilalom sa ordinansa, ang makatudlo og usa ka high value individual target, makadawat og P20,000.00; IDID person of interest – P15,000.00; person of interest sa Barangay Drug Clearing Process – P10,000.00; ug kadtong malambigit sa high impact operation – makadawat og P15, 000.00.
