BUTUAN CITY – Nahimo karong overnight sensation sa Czech Republic ang pamilya sa mga European beavers, kansa mga dagkong klase sa ilaga, dihang duha ka adlaw lang nilang nahuman ang paghimo og sunod-sunod nga mga dams kansa 7 ka tuig na nga gipaningkamutan sa Czech government nga ilang matapos.
Ang proyekto alang sa pagbalik sa water areas sa Brdy Nature Park nagsugod niadtong tuig 2018, apan midagan pa og pila ka tuig ang pagproseso sa mga permit niini hangtud nga nasugdan ang konstruksyon.
Ang gasto alang sa pagbalik sa wetlands sa maong lugar ngadto sa ilang original condition, gibana-banang mu-abot sa 30 million Czech crowns, apan tungod sa pamilya sa kugihan nga mga dagkong ilaga nga beavers, dili na makagasto og bisan usa ka sentabo ang kagamhanan sa maong nasud.
Sigon sa mga environmentalists nga nag-monitor sa Brdy area, duha ka adlaw lang gitrabaho sa pipila ka mga beavers ang paghimo og mga functional dams sa saktong mga lugar, rason nga wala kini nakahasol sa mga tawo. Nakurat na lang ang mga opisyal sa gihimo sa mga beavers tungod kay na-ukasan pa nila ang gobyerno nga pito ka tuig nga gitrabaho ang mga papeles aron lang mariyalisar ang maong mga proyekto samtang sila, duha ka adlaw lang, lapos-lapos na ang tubig sa mga lugar nga gitagan-an niini.
Dugang pa sa mga environmentalists nga mi-inspeksyon sa trabaho sa mga beavers, nahimo ang mga dams sa saktong mga lugar nga maoy nakapabalik sa mga wetlands ngadto sa ilang natural state ug naghatag pa og ha-um nga kapuy-an alang sa mga talagsa-ong stone crayfish, mga baki ug uban pang mga animal species.
