BUTUAN CITY – Gibuhian na sa Houthi rebels sa Yemen ang mga bihag nilang crew sa MV Galaxy Leader.
Ang nasangpit nga barko ilang gibihag sukad pa niadtong Nobyembre 2023 sa dihang gisugdan nila ang pag-atake sa mga barko nga miagi sa Red Sea.
Lakip sa mga crew niini ang 17 ka Filipino seafarers sa nasangpit nga barko. Ang nasangpit nga lakang alayon na usab sa gipatuman nga ceasefire tali sa Hamas ug Israel.
Sumala sa Houthi rebels nga gibuhian nila ang nasangpit nga mga seafarers tungod na usab sa hangyu sa mga mediators nga gipangunahan sa Oman.
Ang gibuhian nga mga bihag nga gilangkuban sa 25 ka nationals gikan sa Bulgaria, Ukraine, the Philippines, Mexico og Romania gitunol ngadto sa Oman.
Sumala sa Houthi leader nga si Abdul Malik al-Houthi ang ilang grupo nga gitawag og Ansar Allah, andam matud pang mo-aksiyon ugaling molapas ang Israel sa ceasefire agreement sa Gaza.
Hilabihang gikalipay ni U.N. Special Envoy for Yemen, Hans Grundberg ang maong balita nga magtuldok na sa gibating kagool dili lang sa mga bihag lakip na usab sa ilang pamilya.
Mahinumduman nga ang Houthis mihimo og sobra 100 ka pag-atake sa mga barko nga miagi sa Red Sea sukad niadtong Nobyembre 2023 isip pakigduyog nila sa mga Palestinians nga gi-atake sa Israel.
