BUTUAN CITY – Mi-abot sa upat ka mga colorum nga sakyanan ang nasapon sa ginsakpan sa Land Transportation, Franchising and Regulatory Board kon LTFRB-Caraga sa gilusad nga Anti-Colorum Operations and Roadside Inspections sa Surigao City kagahapon.
Kini gawas pa sa ubay-ubay nga na-isyuhan og citations tungod sa managlahing kalapasan sama sa kawala’y dashcam sa ilang sakyanan, wala’y CCTV, wala pagsuot sa ilang prescribed uniform, ug illegal terminal.
Nakigtagbo usab kagahapong adlawa sila LTFRB-Caraga OIC Regional Director Maria Kristina Cassion ug Regional Highway Patrol Unit 13 Regional Chief PCOL Lucilo Laguna Jr. kang Surigao del Norte Gov. Francisco Matugas alang sa himuong coordination meeting sa ubay-ubay nga mga colorum operators sa nasangpit nga lalawigan.
Mihangyo usab sila sa gobernador nga magdona og luna sa yuta nga gamitong impounding area alang sa ilang mga provincial operations kansa gisanong usab sa opisyal.
Isip temporary measure, gihangyo sa duha ka mga opisyal ang 30th Infantry Battalion, Philippine Army, partikular si commanding officer LtCol. Jeffrey Villarosa, nga tugutang gamiton una ang protion sa ilang kampo isip temporary impounding area alang sa mga sakyanang madakpan sa Surigao del Norte kansa daling gi-aprubahan sa opisyal.
