BUTUAN CITY- Mas midaghan pa ang gustong magpabakuna kontra sa COVID-19 sa syudad Butuan.
Sa pakighinabi ning sibyahan, gipadayag ni Michiko De Jesus, tigpamaba sa LGU-Butuan City nga sa kasamtangan nagpadayon ang pagmakuna sa ubang barangay ug mga dugang bakuna na lang gikan sa Department of Health (DOH) ang kulang aron matubag ang demand sa mga gustong magbakuna sa syudad.
Sigon ni Michiko kadaghanan sa gustong magpabakuna karon, mao ang mga anaa sakop sa priority group A3 o kadtong mga adunay co-morbidities.
Kamatuoran niini, milapas sa masterlist ang nabakunahan sa maong grupo nga miabot sa kapin 7,000 gikan sa target nga 5,000.
Taliwa usab sa maong ihap, kung lantawon ang kinatibuk-ang dagan sa pagmakuna sa syudad, mas gamay pa gihapon kini nga porsiento sa target nga kapin 200,000 aron makab-ot ang herd immunity.
Sa kasamtangan anaa sa 29,415 pa ang kinatibuk-ang nabakunahang individual sa syudad diin sa maong ihap 22,200 ang nabakunahan sa first dose samtang 7,215 usab sa second dose.
Anaa pa sa 72 percent ang nabakunahan sa A1 prority group, 46 percent sa A2 ug ang milapas sa masterlisted nga A3 priority group, miabot og 123 percent.
Tungod usab kay na-classify ang Butuan City nga high risk sa COVID-19 naglaum si De Jesus nga mas magahinan pa og dugang bakuna ang syudad gikan sa nasudnong panggamhanan.
Una nang nagpadayag ang National IATF nga prioridad sa mga hatagan sa nanganbot nga bakuna ang mga lugar nga na-classify nga taas ang kaso sa tinakdanay.
Naghulat nalang usab ang syudad alang sa pagsugod sa pagmakuna sa mga individual nga anaa sakop sa priority group A4.
