BUTUAN CITY – Bag-o na ang mga board of directors (BOD) sa Diamond Transport Service Cooperative kon DATSCO human hingpit nang napahigayon ang general assembly sa kooperatiba sa covered court sa Brgy. 8, lungsod sa Buenavista, Agusan del Norte kagahapong adlawa human ang pila ka higayon nga pag-uktaba niini.
Sa pakighinabi ning sibyahan kang Romeo Ednilan, usa sa lima ka mga napiling bag-ong Board of Directors sa DATSCO, gibutyag niini nga gitambungan ang maong asembliya sa mga regular ug dili regular members sa kooperatiba gikan sa lahi-lahing lugar sa rehiyon ingon man sa mga kadagkuan sa Land Transportation, Franchising and Regulatory Board kon LTFRB-Caraga, Office of the Transportation Commission kon OTC ug sa Cooperative Development Authority kon CDA-Caraga kansa mao ang nagtugot nga magpahigayon sa maong asembliya.
Sigon ni Ednilan, gipatawag sa maong asembliya si DATSCO chairman Evangelus Lawenko uban sa iyang grupo apan wala sila nanambong.
Alayon niini, gibutyag ni Ednilan nga wala pa usab nahisgutan kung kinsa ang mamahimong sunod nga bag-ong Chairman sa DATSCO kansa pilian lang usab sa ilang lima ka mga bag-ong board of directors.
Gawas sa BOD, bag-o na usab ang anaa sa Audit committee ug election committee sa maong transport group.
Malaumon usab ang ang mga niini makabalik na sa panginabuhian ang mga membro ug mga empleyado human ang maong kalampusan kansa taud-taud nga nakulban og kaldero human gipahunong sa Land Transportation, Franchising and Regulatory Board kon LTFRB-Caraga ang ilang operasyon tungod sa kawala pagpahigayon sa maong asembliya.
