BUTUAN CITY – Balik na sa normal ang kinabuhi sa mga Siarganonons human gitay-og sa magnitude 5.9 nga linog og kapin sa 200 ka mga aftershocks.
Kini taliwa sa ilang pag-panic ka-uban ang ilang mga bisita og mga turistang nataymingang anaa sa maong isla dihang mitay-og ang kusog nga linog.
Sigon sa Siargaonon nga si Ruel Catoto sa eksklusibong pakighinabi sa Bombo Radyo Butuan, nanggawas sila sa ilang tagsa-tagsa ka kabalayanog nahimutangan tungod sa grabe kakusog og taud-taud nga pagtay-og.
Nag-iyahay usab sila pagsaka sa mas taas nga lugar tungod sa kahadlok nga duna’y mu-igong tsunami ilabina nga nag-atubang sila sa Pacific Ocean.
Nasayrang daling gi-mobilize ang mga rescue teams sa Provincial DRRMC og naghimo gilayon og inspeksyon sa siyam ka lungsod sa lalawigan ilabina sa General Luna nga maoy epicenter sa linog.
Apil sa gi-mobilize ang ilang Provincial Social Welfare Office nga maoy naghatag og daling ayuda sa mga nanginahanglang residente. (Beth Ruiz)
