BUTUAN CITY – Gipaniguro sa mga organizers sa Palarong Pambansa 2024 nga igo ang ilang mga medical personnel ug mga doctor nga gi-deploy sa matag-billeting quarters sa Cebu City.
Gipadayag kini ni Department of Education Assistant Secretary Francis Bringas, human gitaho nga na-igo sa dengue fever ang duha ka mga atleta nga misalmot sa maong sporting event.
Gikan pa sa Cordillera Administrative Region ang usa sa duha nga gidala na sa ospital niadtong Biyernes ug nagpa-ayo na karon ug tugutan lang silang makadula kung fully recovered na sila. Nakig-alayon na usab sila sa City Health Department aron masuta kung sa home region ba nila kini nakuha ug sa Cebu City lang nag-manifest.
Gawas niini, nag-request na usab matud pa sa local government unit sa Cebu City ang mga regional delegates nga muhimo og fogging sa mga lugar nga duna’y natalang kaso sa dengue.
