BUTUAN CITY – Padayon ang paghatag og assistance sa Department of Social Welfare and Development kon DSWD-Caraga ngadto sa mga apektadong pamilya sa kusog nga 7.4 magnitude nga linog.
Sigon ni regional spokesperson Mark Davey Reyes, kagahapong adlawa atol sa pagbisita ni Secretary Rex Gatchalian sa Surigao Del Sur, gisugdan na ang paghatag og cash assistance ilalom sa Assistance to Individuals in Crisis Situation kon AICS.
Mu-abot sa 170 ka pamilya ang nakadawat sa 5-mil pesos nga cash human naguba sa hingpit kon totally damaged ang ilang panimalay samtang tag-3-mil pesos ang nadawat sa 30 ka pamilyang partially damaged ang ilang panimalay.
Kini gawas pa sa paghatag og family food packs ngadto sa 84-mil 758 ka pamilya nga kadagahanan sa Surigao Del Sur.
Samtang gisaad usab sa kalihim nga makadawat usab ang tanang pamilya diin ang ilang balay nadamyos sa linog og 11-mil pesos nga cash ilalom sa emergency cash transfer sa Enero 2024.
Gawas niini, duna usa’y psychosocial first aid nga ihatag ang mga personhe sa ahensya ngadto sa mga indibidwal nga na-trauma sa linog.
