BUTUAN CITY – Sukwahi sa na-andan nilang pagmaya atol sa pagsugat sa bag-ong tuig, mas ukupado ang mga Surigaonons, Siargaonons ug mga Dinagatnons sa pagsugat sa bag-ong tuig 2022 sa pagdaginot sa mga gubang kagamitan aron subling mapabarog ang ilang kabalayan nga giguba sa bagyong Odette.
Apan bisan og nawad-an og pinuy-anan ang kadaghanan kanila ug nag-antus lang sa gitukod nga payag, makita gihapon sa ilang dagway ang gamay’ng kalipay dihang natunulan og mga gamit alang sa ilang balay gawas pa sa nadawat nilang mga food ug non-food items.
Nag-iyahay og bitbit ang mga biktima ni Odette og paglaum nga gisaad kanila nga tabangang makabangon, rason sa pagsugod nila sa ilang unang adlaw sa bag-ong tuig 2022 og pag-ayom ayom nila sa ilang mapuy-an.
Gipakita nila sa tibuok kalibutan nga taliwa sa tanan, nagkahi-usa silang mubangon nga gisugdan nila og dungan nga paglimpyo sa ilang palibot human maseguro ang food aid gikan sa nagkada-iyang mga donors nga gitunol kanila.
