BUTUAN CITY – Nag-anam pa kalapad ang mga indibdiwal nga nalambigit sa nagkalalum nga imbestigasyon sa Senado kalabot sa Philippine Offshore Gaming Operators kon POGOs human gibutyag ni Senadora Risa Hontiveros, nga ang kwarta matud pa ni Hongjiang Yang, ang nagpondo sa HongSheng POGO hub.
Si Hongjiang Yang, igsoon matud pa ni Michael Yang, ang presidential economic adviser ni kanhi Pangulong Rodrigo Duterte.
Una nang gi-freeze sa Anti-Money Laundering Council (AMLC) ang bank accounts ni Hongjiang Yang tungod sa mga katingalahang transaksyon niini ngadto sa Baofu Land Development Inc. nga gipanag-iyahan ni Alice Leal Guo, ang suspendidong mayor sa Bamban, Tarlac, diin natukod ang nasangpit nga POGO Hub.
Kahinumdumang konektado usab si Hongjiang Yang ug Michael Yang sa kompanyang Pharmally, kansa nalambigit usab sa personal protective equipment kon PPE procurement scandal atul sa Duterte administration kondiin gi-ila si Michael Yang isip financier ug guarantor sa Pharmally Pharmaceutical.
