BUTUAN CITY – Gi-andam na sa kapulisan sa Claver, Surigao del Norte ang kasong ipasaka batuk sa suspetsadong responsable pagkarga sa daghang mga armas ug mga bala sa usa ka Hi Ace van ug duha ka multicab nga na-intercept sa checkpoint sa kapulisan ug kasundaluhan sa Sitio Kinalablaban, Cagdianao Claver, Surigao del Norte.
Apil sa na-intercept ang 28 ka units sa shotgun, 2 ka caliber 9MM pistol, 2 ka magazines sa caliber 9MM pistol, 9 ka UHF handheld radio, unom ka ALPHA handheld radio, unom ka mga chargers, 295 ka mga buhing bala sa shotgun, lima ka buhing bala sa caliber 9MM pistola nga walay pertinenteng mga dokumento hinungdan nga gisikop ang mga nag-transport niini.
Mga kasong paglapas sa RA No. 10591 kon mas nailang Comprehensive Law of Firearms and Ammunitions ug RA No. 5487 kon An Act to Regulate the Organization and Operation of Private Detective, Watchmen or Security Guards Agencie ang atubangon sa wala pa panganling mga suspetsado ilabina nga pakyas sila pagbutyag sa pangalan sa security agency nga mao matud pa’y hatdan sa mga niini.
