BUTUAN CITY – Nailog ang kampo sa New People’s Army kon NPA human ang engkuwentro tali sa tropa sa 30th Infantry (Fight On) Battalion, Philippine Army sa Barangay Pungtod, Bacuag, Surigao del Norte pasado alas 6:45 sa buntag sa nakalabay nga adlaw.
Natigayon ang engkuwentro samtang nagpatrolya ang mga sundalo nga nakadawat og sumbong mahitungod sa presensya sa teroristang grupo sa dihang kalit silang gibanhigan sa armadong grupo nga nagkampo sa nasangpit nga lugar.
Gitoohang gikan sa Sandatahang Yunit Pangpropaganda 16C2 ug 16C1 sa Guerilla Front 16, Northeastern Mindanao Regional Party Committee (NEMRC) nga gipangunahan nila Alberto Castañeda alyas JD ug Roel Neniel alyas Jacob ang grupo sa NPA na naka-agbat sulod sa 30 minutos.
Human miatras ang mga rebelde, narekober sa kasundaluhan ang usa ka Cal 5.56mm AR15 rifle, usa ka M203 Grenade Launcher, 30 ka mga bala sa AK47 rifle, 20 ka mga bala usab sa M16 rifle, usa ka detonating device para sa iligal nga pampabusikad o improvised explosive device (IED), subersibong dokumento ug mga personal nga kagamitan sa mga rebelde.
Nagpahayag si Lt Col Ryan Charles Callanta, commanding officer sa 30IB sa iyang pasalamat sa katawhan nga mitabang sa paghatag og mga impormasyon mahitungod sa nahimutangan sa mga Teroristang NPA.
