BUTUAN CITY – Nagpadayon ang imbestigasyon kalabot sa nangatagak nga daghang mga armas gikan sa patrol car sa Veruela, Agusan Del Sur ning mi-aging alas-7:20 sa gabii sa may Brgy. Bayugan 3, Rosario, Agusan del Sur kansa gika-alarma sa mga residente.
Gi-angkon sa Officer-in-Charge sa Veruela Municipal Police Station nga si Police Major Kristopher Nono nga gikan kanila ang maong mga armas nga mga nakumpiska, gisurender, gideposito, gi-abandona ug gi-forfeit.
Gi-transport kini padulong sa Police Provincial Office alang sa imbentaryo dihang aksidente nga nangahulog sa kalsada.
Nangayu na lang og dispensa ang hepe sa alarma nga nahatag niini dayong butyag nga duna na’y gihimong imbestigasyon.
Sa kabahinan ni Police Col. Yahya Bustamante Yusup, provincial director sa Agusan Del Sur Police Provincial Office, iya nang gipa-report sa opisina ang hepe og mga personahe niini aron ipasabot ang nahitabo ug kung makita nga duna gayud silay ka-akuhan, dunay tukmang kaso nga ipasaka batuk kanila.
