BUTUAN CITY – Gikumpirma sa Bureau of Immigration nga ania pa sa Pilipinas ang mga tawo nga gi-isyuhan og precautionary hold departure order kon HDO sa korte sa Manila.
Sumala ni Immigration Spokesperson Dana Sandoval, apil niini sila Sen. Jinggoy Estrada, kanhi Department of Public Works and Highways kon DPWH Sec. Manuel Bonoan, Roberto Bernardo, Henry Alcantara, ug Gerard Opulencia.
Base sa ilang monitoring, wala pa makagawas sa Pilipinas ang maong mga indibidwal.
Madumdumang nagpagawas og HDO ang Manila Regional Trial Court Branch 52 nga dili tugotan makagawas sa nasod ang mga respondents sa reklamong plunder may kalabotan sa anumalusong flood control projects.
Gipasabot sa Department of Justice nga ang Hold Departure Order, wala pa nagpasabot nga nahuman na ang pagdungog sa kaso.
Sigon ni Justice Spokesperson Atty. Polo Martinez, precautionary order pa kini kay pending pa ang reklamo ug wala pa pormal nga na-file isip kaso, busa mas sakto nga tawgon sila nga respondents ug dili pa akusado.
Gipagawas ang order human nakita sa korte nga adunay probable cause ug posibilidad nga mukagiw ang mga respondents.
