BUTUAN CITY – Mibati na usab og kabalaka ang mga Agusanon human nga laing oar fish na usab ang napalgang patay na sa baybayon sa Brgy. Manapa, lungsod sa Buenavista, Agusan del Norte.
Base sa gihimong pagsukod sa mga opisyales sa maong barangay pagpanguna ni Kapitan Afro Arreza III, nagsukod og 14 ka tiil ang gitas-on sa maong oarfish samtang 13-pulgadas ang gilapdon.
Nagsugod ang kahadlok sa mga Agusanons og mga Caraganons higayong duna’y makit-ang oar fish dihang gitay-og sa gamhanang 7.2 magnitude nga linog ang Surigao City niadtong Pebrero 10 ning tuiga nga miresulta sa kamatayon sa ubay-ubay’ng katawhan.
Nasayrang pila ka adlaw adiser ang linog, usa ka dakong oarfish pa ang napalgan sa Surigao City.
Sa pinaka-ulahing hitabo, dali gilayong gilubong sa mga opisyal sa Brgy. Manapa ang maong isda human nakuhaan og mga gikinahanglang impormasyon alang sa mga dokumentasyon. (Beth Ruiz)
