BUTUAN CITY – Gilugwayan sa sa Department of Health (DOH) ang “Ligtas Tigdas” vaccination campaign hangtod Pebrero 20, human nga kapin sa 2.2 milyon ka mga bata sa Mindanao ug sa Bangsamoro Autonomous Region in Muslim Mindanao (BARMM) ang nabakunahan na batok sa tipdas.
Sigon sa DOH, mi-abot sa 2,299,034 ka mga bata nga nag-edad og unom hangtod 59 ka bulan ang nabakunahan ubos sa gipakusgan nga kampanya gikan Enero 19 hangtod Pebrero 15.
Ang BARMM mao ang duna’y pinakadaghan nga nabakunahan nga bata nga mi-abot sa 511,321 kansa 89 porsyento sa target niini. Apan bisan pa man, libu-an pa gihapon nga mga bata ang wala pa mabakunahi, lakip na ang 184,824 sa Region XI, 107,573 sa Region XII, 85,743 sa Region X, 76,520 sa Region IX, 65,909 sa BARMM, ug 38,506 sa Caraga.
Sigon sa DOH tumong sa pag-extend sa pagbakuna nga maabot pa ang mas daghang mga bata nga ubos sa lima ka tuig ang pangidaron ug malikayan ang posibleng outbreak sa tipdas.
Alayon niini, gipanawagan ang mga ginikanan ug guardians nga dad-on ang ilang mga anak sa pinakaduol nga vaccination site o health center sa ilang lugar.
