BUTUAN CITY – Produktibo ang panagkita nila United States President Donald Trump ug New York City Mayor-elect Zohran Mamdani sa White House, kondiin pareho silang nagpadayag sa ilang paglaum alang sa maayong realsyon taliwa sa pareho nilang mga pagsaway sa usa’g usa ning mi-aging mga semana.
Sa ilang pag-atubang sa mga tigbalita, gidayeg ni Trump ang Muslim politician nga si Mamdani kinsa una na niyang gitawag nga “jihadist” ug gibaharan pa biyang tangtangan sa US citizenship – tungod sa iyang malampusong kampanya ug pagtutok sa mga cost-of-living issues.
Dugang sa presidente, produktibo ang ilang panagtagbo ilabina nga duna sila’y komon nga panglantaw – ang pagpalambo pa sa New York dayong timbaya kang Mamdani sa pagpildi sa iyang mga karibal.
Misaad usab kining tabangan niya ang mayor sa mga tinguha niini alang sa siyudad nga pareho nilang gipangga.
Samtang sa panig usab ni Mayor-elect Mamdani, gipadayag niini nga gidayeg niya ang ilang panagkita tungod kay nakatutok kini sa hini-usang pagdayeg ug gugma sa ilang siyudad ilabina ang pagresolba unya nila sa mga isyu sama sa renta, pabalay, mga utilities ug mga groceries.
Dihang gipangutana kalabot sa pipila ka mga isyung duna sila’y managlahing baruganan sama sa immigration enforcement, gipadayag ni Mamdani nga naglaum gihapon siya nga magka-uban sila pagtrabaho alang sa usa lang ka tumong.
