BUTUAN CITY – Bisan og wala direktang gitumbok ni kanhi Congressman Mike Defensor kung impartial ba karon ang Senate Blue Ribbon Committee sa ilang imbestigasyon kalabot sa mga anumalusong flood control projects kondiin nasulod na usab ang 2025 budget insertions, apan klarong duda na ang kanhi magbabalaud sa kapasidad karon ni committee chair Ping Lacson.
Sa usa ka interview, gipasabot ni Defensor nga in fairness sa senador, iya kining na-ilhan kaniadtong aktibo pa siya sa Kongreso, nga supak gayod kini sa mga insertions.
Apan karon, nabasa niya og klarong nakita usab matud pa sa mga tawo, nga duna’y gustong ipakaylap nga script o naratibo ang senador aron maoy tu-uhan sa katawhan.
Sigon ni Defensor, dako kining sayop ilabina nga daghan ang nasayod kung unsa ang kamatu-uran base na sa nanggawas nga mga pamahayag sa gihimong mga unang imbestigasyon.
Tungod niini, hagit niya kang Lacson nga bisan unsa ang mugawas sa ilang imbestigasyon, ipagawas na tanan sa komite ug dili kay duna’y tabunan nga mga tawo o panghitabo.
Karong gikumpirma na usab ni Lucas Bersamin nga dili tinuod ang gipasi-atab sa Malakanyang niadtong Lunes nga miluwat siya isip executive secretary tungod sa delicadeza, gihagit niya kining mutumaw ug isulti ang tinuod ka-uban ang mi-resign nga si kanhi Budget Sec Amenah Pangandaman.
Kini aron mabulgar na kung kinsa gayod ang duna’y sala ug tulubagon sa katawhang Filipino tungod sa garapalang kurapsyon nga natigayon karon sa gobyerno.
Kinahanglan matud pang panalipdan ni Bersamin ang dugay nang na-establisar niyang dignidad isip kanhi chief justice nga karon, gub-on lang sa takulahaw.
