BUTUAN CITY – All set na ang Diocese of Butuan sa pagsugod na sa simbang gabi ugma sa alas-7:30 sa gabii ug sa misa de gallo unyang alas-kwatro sa kaadlawon – ang siyam ka adlaw nga novena alang sa Birhen Maria ug usa ka pagpangandam sa pasko gikan ning adlawa Disyembre 16 hangtod 24.
Sa eksklusibong pakighinabi sa Bombo Radyo Butuan, gipadayag ni diocese spokesperson Reverend Fr Glenn Adam Abamonga andam na silang dawaton ang mga manimbahay.
Gipadayag ni Fr Abamonga nga tungod sa pagpangandam nila sa espesyal nga misa ilabina unyang alas-kwatro sa kaadlawon, ila unang gikansela ang ikaduha nga daily mass nga na-andang ginahimo matag-alas 6:15 sa sayong buntag ilabina sa may St Joseph Cathedral.
Wala usa’y ka-usaban sa oras sa misa sa adlaw’ng Dominggo gawas lang sa madugang nga misa de gallo sa alas-kwatro sa kaadlawon.
Nakig-alayon na usab sila sa mga government line-agencies alang sa pag-secure sa mga manimbahay apil na niadtong mga sakyanan nga ipangbilin duol sa simbahan aron malikayan ang mga dili maayong panghitabo sa mi-aging katu-igan nga nabiktima sa bukas kotse ang pipila ka mga sakyanan.
Kini gawas pa sa ilang mga staff ug volunteers nga maoy ilang gi-incharge sulod sa simbahan.
