BUTUAN CITY – Misibat na sa Madagasacar ang ilang presidenteng si Andry Rajoelina human sa dagkong protesta nga gipangunahan sa kabatan-unan ug pagbali sa pipila ka yunit sa kasundalohan, sumala sa mga opisyal niadtong Lunes.
Kini na ang ikaduhang higayon sulod lang sa kapin usa ka bulan nga ang mga kalihokan nga gipangulohan sa Gen Z nakapahagba sa gobyerno subay sa pangkalibutang kagubot.
Sigon ni opposition leader Siteny Randrianasoloniaiko, mikagiw si Rajoelina gikan sa Madagascar human mi-abin sa mga nagprotesta ang ubang yunit sa militar.
“Gitawagan namo ang mga empleyado sa opisina sa pagkapresidente ug gikompirma nila nga nilakaw na gyud siya sa nasod,” matod niya, nga midugang nga wala pa gihapon mahibal-i kung asa karon ang presidente.
Sa usa ka Facebook address kagabii, gibutyag ni Rajoelina nga mibalhin siya sa usa ka luwas nga dapit alang sa iyang kaugalingong proteksyon apan mibalibad siya pagbiya sa pwesto, dayong butyag nga dili niya tugotan nga maguba ang Madagascar.
Sumala sa usa ka tinubdan sa militar, si Rajoelina milarga sakay sa French military aircraft nga mibyahe gikan sa Sainte Marie airport kagahapon.
Matod sa French outlet nga RFI, nakigsabot matud pa si Rajoelina kang French President Emmanuel Macron, apan gibutyag ni Macron nga dili pa niya makumpirma ang papel sa France sa hitabo, dayong butyag nga kinahanglan g mapreserba ang konstitusyonal nga kaayuhan.
Nagsugod ang mga protesta niadtong Septyembre 25 tungod sa kakulang sa tubig ug kuryente, apan dali kining nahimong nasudnong pag-alsa batok sa korapsyon, daotang panggamhanan, ug nagkagrabeng kapobrehon.
Niadtong weekend, ang elite military unit nga CAPSAT — kans amaoy mitabang kang Rajoelina nga makakuha sa gahum niadtong 2009 coup — mi-abin na sa mga nagprotesta ug mibalibad nga pusilon sila dayong kuha sa kontrol sa militar ug nagpahimutang og bag-ong hepe sa kasundalohan, rason sa pahimangno ni Rajoelina nga adunay pagsulay pagkudeta batok kaniya.
Misunod kanila ang usa ka grupo sa paramilitary gendarmerie dayong butang sa ilang kaugalingong commander sa usa ka pormal nga seremonya nga gitambongan sa mga opisyal sa gobyerno.
Puli usab ang Senate president, nga nahimong usa sa mga target sa kasuko sa katawhan.
Libuang mga nagprotesta ang nagkatigom sa main square sa Antananarivo samtang gisinggit ang mga pulonng nga pabiyaon ang presidente.
Sumala sa United Nations, dili moubos sa 22 ka tawo ang namatay sa mga gubat sukad nagsugod ang kagubot.
Ang Madagascar, nga adunay hapit 30 milyones ka lumulupyo ug median age nga ubos sa 20 anyos, nagpabiling usa sa pinakapobre nga nasod sa kalibutan, diin tulo ka bahin sa upat sa populasyon, mga pobre.
