BUTUAN CITY – Gipadalhan na og subpoena sa National Bureau of Investigation (NBI) sila Michelle Dee, Rhian Ramos ug beauty queen nga si Samantha Panlilio base na sa pagkumpirma sa legal counsel ni Dee nga si Atty. Maggie Abraham-Garduque.
May kalabotan kini sa gika-ingong pagpangulata ug ilegal nga pagpugong sa tulo batok sa kanhi driver ni Ramos nga nailhan nga si alyas Totoy niadtong Enero 17 hangtod 19.
Nadawat na sa law office sa legal team ni Dee ang subpoena nga gipagawas sa NBI tungod kay sila nag-file og entry of appearance aron ang tanan nga notices alang kang Michelle Dee direkta nga ipadala sa ilang opisina.
Gisiguro sa abogado nga motuman ang iyang kliyente sa subpoena aron mapaminaw ang ilang panig kalabot sa maong isyu.
Naglaum usab ang kampo ni Michelle Dee nga makab-ot nila sa katapusan ang hustisya.
Sa pagkakaron, wala pa’y gipagawas nga pamahayag ang kampo nila Ramos ug Panlilio kalabot sa subpoena.
