BUTUAN CITY – Gipa-isyuhan og subpoena duces tecum sa Senate Blue Ribbon Committee si kanhi Department of Public Works and Highways Undersecretary Maria Catalina Cabral tungod sa iyang pagka-absent sa hearing sa komite ning adlawa.
Ang hearing nagtutok sa anomalusong flood control projects nga gilambigitan sa mga opisyal sa DPWH, mga contractors ug mga kongresista.
Dihang gipangutana ni Senador Rodante Marcoleta si DPWH Secretary Vince Dizon kung nganong wala kini makatambong sa pagdungog, gipasabot sa kalihim nga kini tungod kay iya nang gidawat ang courtesy resignation niini ning mi-aging duha ka gabii.
Apan giklaro sa kalihim nga mahimo pa gihapong patambungon sa pagdungog si Cabral kung kinahanglanon sa komite nga daling gi-uyunan ni Marcoleta sa rasong duna’y mga pangutana nga si Cabral lang ang direktang makatubag.
Gika-ingong nagpadala matud pa si Cabral og mensahe ngadto sa staff ni Senate President Vicente Sotto III aron pasayron kining gidawat na ang iyang resignation ug dihang gipangutana, gipanghimakak kini sa senate president apan gipakita ni Sen. Ping Lacson ang screenshot sa Viber message nga nagpalig-on sa gipadala niining pahibalo.
Tungod niini, nagmosyon na si Marcoleta nga isyuhan og subpoena si Cabral aron makatambong kini sa sunod nga pagdungog.
