BUTUAN CITY – Fully vaccinated na ang mayor sa lungsod sa Claver, Surigao del Norte nga si Georgia Gokiangkee human siya natupukan sa ikaduhang dose kaganina uban sa lain pang mga senior citizens.
Sigon sa mayor, kini ang dugay na nilang gipa-abot sukad pa ning mi-aging tuig rason nga human siya natupukan sa ikaduhang dose kaganina, iya gilayong gipanawagan ang tanang mga senior citizens sa ilang lungsod nga i-avail na kini nga higayon samtang sila ang prayuridad karon nga roll out.
Kini aron dili na matud pa bation og kakulba higayong makagawas sa ilang pinuy-anan tungod kay kung ma-igo matud pa sila sa COVID-19, dili na kini maghatag og dakong epekto sa ila unyang kondisyon.
Aminado si Mayor Gokiangkee nga daghan sa mga senior citizens sa ilang lungsod ang nagduha-duha pagpabakuna tungod sa mga sayop nga impormasyong naka-abot kanila nga naghatag kanila og kabalaka.
Tungod niini, nagtinabangay sila pagpakusog pa sa ilang information drive aron lang ma-agni ang katigulangan sa ilang lungsod nga magpatupok na.
Kini usab ang rason nga una siyang nagpatupok aron maghatag og kadasig sa mga seniors na nga sama kaniya nga i-avail ang maong bakuna samtang duna pa’y supply alang kanila.
