BUTUAN CITY – Nahukmang guilty sa Sandiganbayan 3rd Division sa kasong graft si Mayor Peter Payna Ruaya sa Dapa, Surigao del Norte og gihukmang mabilanggo og maximum nga walo ka tuig.
Nakonbikto si Ruaya og paglapas sa Section 3(e) sa R.A. 3019 kon Anti-Graft and Corrupt Practices Act uban nila Municipal Budget Officer Zosimo Melindo Cuizon og bids and awards committee kon BAC member Alicia Tokong Durero.
Silang tulo gihukman og minimum nga unom ka tuig og usa ka buwang pagkabilanggo ngadto sa maximum nga walo ka tuig uban sa perpetual disqualification gikan sa paghupot og public office.
Mahinumdumang gikasuhan sila uban nila Konsehal Henry Golindan Tiu, Kenneth Joel Yu Tiu, Florita Gotico Tesiorna, Francisco Matugas Gonzales, Dionisio Payna Ruaya, Renz Jerald Yangzon Ruaya, og Simpriso Ranza Jr., apan ang uban na-acquit tungod sa kapakyas sa prosekusyon nga mapruybahan nga sila guilty beyond reasonable doubt.
Nagsumikad ang kasong ilang gi-atubang gikan sa anumalusong pag-release sa 13-milyunes, 31-mil, 754-pesos alang sa acquisition sa upat ka mga dump trucks, tag-usa ka pay loader, bulldozer, og grader.
Gihimo matud pa ang purchase bisan og wala kini aprubahi sa Annual Procurement Plan (APP) sa munisipyo alang sa tuig 2008, og taliwa sa kawala’y pundo alang sa pagpalit sa mga niini.
Mi-purchase niini ang mga akusado bisan og wala’y ginegosyar nga procurement, og gitugutan pa si Ruaya sa konseho nga mu-utang pinaagi sa Land Bank of the Philippines aron mapunduhan ang maong acquisition. (Beth Ruiz)
