BUTUAN CITY – Malampuson ang gipahigayong operasyon sa mga otoridad kagahapong adlawa sa lungsod sa Lingig, Surigao Del Sur diin duha ka kandidato nga midagan sa pagka-mayor ang nadakpan lakip na usab ang bodyguard nga wanted person.
Gihimu ang operasyon sa hiniusang puwersa sa sa Criminal Investigation and Detection Group-Surigao del Sur, PNP Special Action Force, Lingig Municipal Police Station, ug Regional Intelligence Division.
Sigon ni Police Lt. Col. Cholijun Caduyac, regional Chief sa Criminal Investigation and Detection Group kon CIDG-Caraga, unang gi-implementar ang search warrant ngadto sa panimalay ni Incumbent Mayor Roberto Luna Jr. sa may Barangay Poblacion mga alas 3:20 sa kaadlawon og nakuha ang usa ka Colt caliber .45 nga pistola, magazine nga puno sa bala sa kalibre 9mm, magazines sa caliber .45 pistol, KG9, rifle grenade, ug pinaugang dahon sa marijuana.
Lakip usab sa nakuha ang mukabat sa 2-milyones pesos nga salaping cash nga tag-100 piso bill diin gisulod kini sa puting sobre nga duna pay sample ballot.
Nasayrang si Lingig Mayor Roberto Luna usa ka high-value target sa kapulisan ug nalakip sa narcolist ni Pangulong Rodrigo Duterte.
Sa laing bahin, gironda usab niini ang panimalay sa Barangay Kapitan sa Barangay Tagpoporan nga si Edgar Acdog kansa midagan usab pagka-mayor sa maong lungsod.
Nakuha gikan sa posisyon niini ang usa ka baby armalite, KG-9, pistol og daghang mga bala.
Samtang lakip sa nadakpan usab ang bodyguard sa kapitan nga si Lolo Kislan alyas Alvin kansa top 5 most wanted person sa kasong frustrated murder.
Sa karun, gi-andam na ang mga dokumentong gamiton sa pagpasaka ug kaso batuk sa mga dinakpan nga gikustudiya karun sa kapulisan alang sa tukmang disposasyon.
