BUTUAN CITY – Direktang gitumbok ni Mayor Jose Cuyos sa lungsod sa Rosario, Agusan Del Sur nga pamolitika ang hinungdan nganung wala pa ma-aprubahan hangtud sa karun ang annual budget alang sa tuig 2025.
Sigon ni Mayor Cuyos nga gusto matud pa sa Sanguniang Panlungsod nga dili makalihok ang mayor rasong sige lang giusab ang gisugyot nga annual budget. Misaad na usab ang Sanguniang Panglungsod nga karung lunes nila aprubahan butang nga dili na katoohan kay daghang lunes na ang milabay sa ilang gisaad.
Sumala ni Mayor Cuyos nga dakong epekto kini sa ilang lungsod diin sa karun wala pa silay trabahante nga Job Order kon JO.
Gidangop na matud pa niya kini ngadto sa gobernador ang maong problema. Lakip usab sa naapektuhan ang implementasyon sa mga proyekto sama sa concreting sa public market.
Giangkon pa sa mayor nga iya nang kaugalingong kwarta ang gihatag sa mga mangayu og hinabang sa iyang lungsod. Nanghinaot nalang ang mayor nga aprubahan na kini tungod kay kung dili mapugos siya sa pag-re-enact niini aron lang makalihok ang lungsod sa Rosario.
