BUTUAN CITY – Nagduso na ang Office of the Solicitor General og quo warranto petition batuk kang suspended Bamban, Tarlac Mayor Alice Guo nga posibleng muresulta sa hingpit nga pagkatangtang niini gikan sa posisyon sa gobyerno.
Sa petisyong giduso ngadto sa Manila Regional Trial Court, makita sa unang palid nga ang gibutang nga respondent mao si Guo Hua Ping alyas Alice Leal Guo.
Una nang gikumpirma sa National Bureau of Investigation nga si Guo ug ang Chinese passport holder nga si Guo Hua Ping, susama og fingerprints kansa nagpasabot nga usa lang sila ka tawo.
Madumdumang niadtong unang bahion ning bulana, nagduso ang OSG og petisyon nga mihangyong ikansela ang birth certificate ni Guo.
Una nang gibukyag ni Solicitor General Menardo Guevarra nga higayong kanselahon kini, mawad-an na og importanteng depensang kuptan ang suspendidong opisyal kalabot sa iyang identity.
Apan sa panig usab ni Guo, pila ka higayon na niining gipanghimakak ang mga alegasyon batuk kaniya ilabina ang pagdamay kaniya sa gi-atakeng POGO hub sa iyang lungsod sa Bamban nga nalambigit sa mga ilegal nga operasyon.
