BUTUAN CITY – Ang mas efficient ug mas epektibong sistema sa pamulis sa Indonesia may nakita ni Bombo international correspondent Rudy Gealogo-Celeste, lumad nga taga-Kitcharao, Agusan del Norte ug kasamtangang nagpuyo sa Tangerang City diin nadakpan si Alice Guo, nga rason nga dali rang nadakpa ang dismissed mayor sa Bamban, Tarlac.
Sa eksklusibong pakighinabi sa Bombo Radyo Butuan, gibutyag sa head sa Alliance of Filipino Overseas Community kon AFOCOM, ang kasibot sa mga Indonesians nga makatabang aron mamintina ang kahapsay ug kalinaw sa ilang palibot maoy magdasig kanilang mutabang sa gobyerno ilabina kung duna’y mga pinangita sa balaud aron gilayon kini masikop.
Kabahin na matud pa kini sa responsibilidad sa matag-Indonesian rason nga kung masayran sa matag-indibidwal nga duna’y tawo sa ilang lugar nga duna’y arrest warrant, ila gilayon kining isumbong sa mga pulis dili sama sa Pilipinas nga pulos lang hearing ang himuon nga kapoy matud pang paminawon.
Gipasigarbo pa Celeste nga ang ingon niini nga kasong gi-atubang ni Alice Guo kansa high profile ug kasong kriminal, dili na matud pa i-agi og hearing sa bisan unsa mang ahensya sa gobyerno tungod kay ideretso na kini sa pagpasaka og kaso sa korte.
Tumong niini nga malikayan matud pa ang trial by publicity hinungdan nga ang live coverage, didto na himuon sa korte atol sa pagdungog na unya sa kaso aron mahatagan og higayon ang gikasuhan pagpadayag sa iyang panig.
