BUTUAN CITY – Pabiling negatibo sa COVID-19 ang Republic of Marshall Islands tungod sa hugot nga lockdown nga gipatuman sa gobyerno dihang unang mi-ulbo ang pandemic.
Sa pakighinabi sa Bombo Radyo Butuan, gipadayag ni Lanie Redillas Badayos, lumad nga taga-Brgy.2, Cabadbaran City, kinsa 10 na ka tuig nang nagpuyo sa maong isla, nga hangtud karon, wala’y mga barkong gipadunggo sa ilang pantalan og sirado pa gihapon ang ilang mga tugpahanan rason nga wala’y mga tawong makasulod-gawas sa ilang lugar.
Bisan og naka-lockdown sila apan pabiling normal ang ilang inadlaw-adlaw nga panginabuhian kondiin wala sila’y gipatumang social distancing ug wala usab sila gipasuot og face mask.
Iyang gipasabot nga hugot ang monitoring nga gihimo sa ilang kagamhanan aron lang wala’y makasulod sa ilang lugar nga mga gikan sa langyaw’ng nasud ilabina niadtong duna’y kaso sa COVID-19 tungod kay higayong masudlan sila, seguradong silang tanan matud pa ang malaras niini tungod sa kagamay lang sa ilang gipuy-ang isla.
Kini matud pa ang rason nga bisan ang mga barkong duna’y kababayang Pinoy, diha lang kutob sa lawod tungod kay wala’y gitugutan kanilang makakanaog gikan sa ilang gisakyang barko.
