BUTUAN CITY – Padayong gi-ulan og mga pagtimbaya si Mark “Magnifico” Magsayo human ang iyang impresibong away batuk kang Ecuadorian boxer Bryan Mercado via second-round technical knock-out kon TKO.
Sa ilang away nga gipahigayon sa Long Beach, California, gipahagba ni Magsayo si Mercado sa upat ka higayon gamit ang mga left hook. Sa kasamtangan, ikatulo na si Magsayo sa World Boxing Council kon WBC super featherweight division, ug target niya ang usa ka world title eliminator batuk kang Eduardo Hernandez sa Mexico.
Ang iyang promoter nga si Sean Gibbons padayong nangita og paagi aron maselyuhan ang ilang away. Mi-ani og pagdayeg gikan sa mga fans ug mga ka-ubanang Pinoy boxers ang gibansagang “Magnifico” apan hagit niini sa kaugaligon, padayon pa ang iyang pagpangandam alang sa umalabot nga mas dagkong away sa tuig 2025.
