BUTUAN CITY – Linaw kaayo karon ang sentrong bahin sa Marawi City nga daw ghost city na tungod sa kawala’y tawo nga naglakaw-lakaw og duna gihapo’y madunggan nga panagsang mga paka-paka kon buto-buto sa armas sa maong dakbayan.
Kini ang gi-asuy ni Mark Anthony Aragon – nurse sa Amay Pakpak Medical Center kansa usa sa gisulod sa teroristang grupong Maute kagahapong adlawa.
Gani, sirado karon ang tanang mga establisamiento tungod sa kahadlok sa mga negosyante nga madamay sa kagubot o kaha ukupahan sila sa Maute group.
Gipadayag pa ni Aragon nga sobrang kahadlok ang gibati sa iyang mga ka-ubanan kagahapon nga timing usab nga off-duty siya tungod kay dihang gisulod kini sa mga Maute members gipatago na ang mga Christian nurses tungod kay sila matud pa ang target nga pangutan-on sa grupo.
Mibalik lang sa normal ang tanan dihang mibiya na ang mga rebeldeng Muslim kagabii human natambalan ang ilang mga ka-ubanang samaran. (Beth Ruiz)
