BUTUAN CITY – Gihulat na lang ni Kapitan Mario Sonny Calo sa Brgy. Sumilihon ning siyudad sa Butuan ang rekomendasyon gikan sa City Health Office ug sa City Environment and Natural Resources Office kon City-ENRO batuk sa poultry farm nga anaa sa ilang barangay nga maoy gireklamo sa iyang mga constituents tungod sa kadaghan kaayong langaw karon ilabina sa Purok 1-Cebuano.
Sa eksklusibong pakighinabi sa Bombo Radyo Butuan, gipadayag ni Kapitan Calo nga ang building sa maong poultry farm ug ang yuta niini, gipanag-iyahan ni Ferdinand Manlapaz.
Gi-abangan matud pa kini karon sa anak ni Marietta Durico aron subling operisyunan kansa gipa-agi una niya sa public consultation nga gi-uyunan usab sa katawhan rason nga nahatagan og permit provided nga musunod sila sa mga patakaran sa hingtungdang ahensya sa gobyerno.
Dihang nag-operate na, ila kining gi-inspeksyon human naka-harvest niadtong ning Enero 3 ning tuiga, ug dinhi nila nasuta nga wala gihapon gisunod ang patakarang gitakda sa City ENRO dihang una kining gipasira tungod sa susamang yangungo kansa maoy rason nga na-isyuhan kini og cease and desist order.
Hinuon, mipasalig si Kapitan Calo nga kung irekomenda sa maong mga ahensya nga dili na ibalik ang operasyon niini, paningkamutan nilang dili na kini makabalik pa sa hingpit.
