BUTUAN CITY – Naglusad og transport strike ning adlawa ang grupo sa transportasyon nga Samahang Manibela Mananakay at Nagkaisang Terminal ng Transportasyon kon MANIBELA aron awhagon si Pangulong Ferdinand Marcos Jr. nga ibasura ang Public Transport Modernization Program.
Sigon ni MANIBELA Chairman Mar Valbuena, nakapokus ang ilang strike sa mga protest center sa Monumento, Nagtahan, Pasig Palengke, Starmall-Alabang, Gatchalian Puregold Parañaque, Punta Tulay Manila, Muñoz Market Quezon City, Marcos Hi-Way Marikina, Shell- Brgy Gulod Novaliches QC, Camarin Zapote Road North Caloocan ug Pulang Lupa Bernabe Las Piñas City.
Mala-umon silang paminawon sila sa pangulo ug mabasa ang resolution sa Senado nga nanawagan alang sa suspensiyon sa programa. Gibutyag usab ni Valbuena nga dili pa andam ang nasud alang sa PUV Modernization program.
Ang ilang transport strike karyong adlawa patilaw lang matud pa sa ilusad nilang 3 ka adlaw nga hunong-pasada karong Miyerkules,Agosto 14 hangtud Biyernes, Agosto 16.
