BUTUAN CITY – Mapasigarbuhong gitaho ni Del Carmen, Siargao Island, Surigao del Norte Mayor Alfredo Coro II nga gikatakda nang ideklara sa Independent Advisory Committee for the Wetland City Accreditation kon ICA-WCA scheme ang ilang mangrove forests isip New Ramsar Wetland of International Importance.
Sa eksklusibong pakighinabi sa Bombo Radyo Butuan, gibutyag sa mayor nga ikasiyam kini sa wetland conservation category status sa entiro Pilipinas ug ikaduha sa Caraga Region sunod sa Agusan Marsh.
Gani karon, nag-develop na sila og mga bag-ong atraksyon sulod sa mangrove forests padulong sa Sugba lagoon ug usa niini ang del Carmen board walk nga duna’y gilay-ong 1.2-kilometros diin mahimong mag-biking ang mga interesadong turista.
Kini gawas pa sa gi-organisa nilang managlahing kalihukan uban sa mga events groups apil na ang mga international events.
Tinguha nila nga dili lang ang mga tourist attractions ang makita sa mga turista ilabina sa mga langyaw kondili apil na mismo ang kultura sa Pilipinas sama sa sabong nga maoy hilig sa mga Pinoy ug maoy rason nga magtukod sila og cockpit arena.
