BUTUAN CITY – Nasampulan gilayon sa lungsod sa Nasipit, Agusan del Norte ang kamanduang gipakanaog kagabii ni Pangulong Rodrigo Duterte nga pusilon ang tawong magsamok-samok sa quarantine control checkpoints.
Kini human nga ang nagmaoy nga usa ka lolo kinsa wala mupatuo sa mga naka-detail nga pulis kaganina sa checkpoint sa Brgy Amontay sakop sa maong lungsod hinungdan nga kini gipusil kaganinang alas-10 sa buntag.
Naila ang napusilan nga si Junie Piñar, 63-anyos, buwag sa asawa ug residente sa Purok 4 sa maong barangay.
Sa eksklusibong pakighinabi sa Bombo Radyo Butuan, gipadayag ni Amontay Brgy. Kapitan Jose Calipusan nga kagabii pa gibadlong sa iyang mga barangay tanod ang namatay tungod sa pagsinggit-singgit niini dihang nahubog.
Kaganinang buntag gipadayon pa niini ang pag-singgit singgit og dihang wala na mupatuo sa mga silingan, girespondihan gilayon kini sa mga barangay tanod apan inay nga mupatuo gigukod na hinuon sa suspek ang mga tanod samtang giwara-wara ang sundang rason nga nanagan sila padulong sa checkpoint.
Gisulayan matud pa ni Police Staff Sgt. Rolly Liones pagpakalma niini apan wala kini mupatuo hinuon gihana-an pa kini og tigbas samtang gitigbas usab ang patrol car rason nga gipusil na kini ug na-igo sa ulo hinungdan sa iyang hinanaling kamatayon.
