BUTUAN CITY – Nadiskubrehan ang patay’ng lawas sa usa ka mananagat nga nag buy-od sa kaugalingon niining pumpboat sa lawod nga bahin sa Sitio Sumilom, Brgy. Lipata, Surigao City.
Giila ang biktima nga si Angelito Azarcon Cavite, 45 anyos, menyo ug residente sa Brgy. Sabang 3, sa parihong syudad. Matod pa Septyembre 25, 2017 sa kapin kon kulang 4:30 sa sayong buntag diin ang biktima nipaingun sa pagpanagat sa nasampit nga lugar.
Sigon sa naka diskubre nga usa ka mananagat nga si Ruben Labisto, 59 anyos, menyo ug residente sa P-2, Brgy. Sabang 3, sa nasangpit nga syudad, sa mga alas 10 kapin sa buntag boot na unta manguli sila uban sa mga kaubanan niini tungod kay nagdaot na ang panahon nianang buntaga. Apan namatikdan nila nga ang pumpboat sa biktima nagkaanam na ug kaanod palayo ug wala na silay nakita nga tawo.
Hinungdan nga ila kining gisusi ug nadiskubrehan ang nag buy-od na nga biktima sulod sa pumpboat nga gisakyan. Ila kining gisangpit ug gi pukaw apan ilang nasayran nga nakabsan na kini sa kinabuhi.
Kasamtangang giimbestigahan ang insidente sa mga personahe sa Surigao City PNP. Samtang ang patay’ng lawas sa biktima gipahiluna sa usa sa mga punerarya sa nasangpit nga syudad. (Mel Valledor)
