BUTUAN CITY – Padayon pa ang imbestigasyon sa Butuan City Police Station 1 sa natigayong pagpamusil kaganinang udto nga gika-angol sa biktimang manager sa usa ka hotel. Naila ang biktimang si Norlie Dizon, manager sa Y Hotel sa may 9th St., Montilla Boulevard, Brgy. JP Rizal ning siyudad.
Sa eksklusibong pakighinabi sa Bombo Radyo Butuan, gibutyag sa tag-iya sa tindahan nga si Cerela Gonzales, nga mipalit matud pa og snacks ang biktima dihang nakita niyang duna’y mihunong nga motorsiklo kondiin mikanaog ang angkas niini dayong tira sa biktima.
Duha ka nga buto sa armas matud pa ang iyang nadunggan nga milanog og daling nanibat padulong sa wala matinong direksyon.
Sa pinaka-ulahing impormasyon nga nakuha ning sibyahan, na-operahan na ang biktima human daling gidala sa usa ka pribadong balay-tambalanan ning siyudad sa Butuan.
