BUTUAN CITY – Gikuso-kuso og maayo sa bagyong Odette ang dose ka mga barangay sa lungsod sa Dinagat sa Dinagat Islands province nga duna’y kapin 11-mil ka populasyon.
Sa saysay sa usa ka survivor sa pakighinabi sa Bombo News Team, sa ilang barangay lang sa Oseniara, sa 160 ka mga balay, 11 na lang ang nagbarog apan kini wala na’y atop.
Bisan matud pa ang ilang mga eskwelahan, barangay hall apil na ang ilang municipal hall, giguba usab ni Odette apil na ang ilang mga gamit sa munisipyo.
Ang ila na lang gipasalamat kay wala’y nakalas nilang mga kababayan ug wala pa niya masayri kung duna ba’y angol.
Tungod sa grabe kaguba na sa ilang lalawigan, nanawagan siya sa tanang gustong mutabang ilabina sa gobyerno nga unta, unahon ang paghatag kanila og ‘pagkaon nga maoy pinaka-importante ug ayuhon ang naguba nilang mga pasilidad.
Sa pagkakaron, ang ginapamalit matud pa nila nga bugas, mga nabasa sa bagyo tungod sa kawala na’y laing madawdaw.
Emosyunal usab kining nanawagan sa iyang mga kababayan nga magpakalig-on ug maghi-usa silang tanan alang sa ilang dungan nga pagbangon uban sa unta pagtabang sa gobyerno.
