BUTUAN CITY – Gipa-ambit sa usa ka mall goer ang trauma nga iyang nasinatian human ang pagtay-og sa 5.3 magnitude nga linog kagabii diin ang sentro anaa sa Talacogon, Agusan Del Sur apan kusog usab nga nabati sa kasikbit nga mga lugar.
Sigon ni Mark Junsoo Ore, anaa siya sa mall sa San Francisco aron mupalit og gamit pangtulog sa bata tungod kay ang iyang asawa anaa pa sa ospital ug bag-ong nanganak.
Hilabihan matud pa ang iyang kahadlok tungod kay sa pagtay-og na, nangahagbong ang suga sa maong mall samtang ang tanan nag-panic.
Napalong usab ang kuryente rasong ngit-ngit kaayu ang mall diin anaa siya sa 2nd floor.
Hinoon wala siya’y nasayran nga dunay nasamdan o na-angol sa maong insidente apan dunay tigulang nga nadagma tungod sa pagkatarantar.
