BUTUAN CITY – Miresulta sa pagkasikop sa Malaysian national og laing 4 pa nga pinangeta sa balaod ang gikasang simultaneous operation niadtong martes dinhe sa rehiyon sa Caraga.
Sigon ni Police Brigadier General Gilbert DC Cruz, Regional Director sa Police Regional Office kon PRO-13, sa sunod-sunod nga implementasyon sa warrant of arrests, nasikop si Lee Chai nga naila usab nga Ho Ik Chai, 58-anyos, Malaysian national kansa responsable sa pagpang- recruite sa mga minor-de-edad sa Tubay, Agusan del Norte.
Gi-aresto si Lee Chai pinaagi sa Alias Warrant of Arrest nga gi-isyu ni Hon. Fernando R Fudalan, presiding judge sa 10th Judicial Region, Branch 34, Cabadbaran City, Agusan del Norte sa paglapas sa RA 9208 o Anti-Trafficking In Persons Act diin walay girekomendang piyansa.
Na-aresto usab si Bruce Lee Inta, 30-anyos, number 4 Most Wanted Person sa Lingig, Surigao del Sur tungod sa kasong qualified rape.
Lakip sa nadakpan sila Nino Villamil, 41-anyos, wanted sa kasong Anti Violence against Women and Their Children Act of 2004 , Carl Klinton Haya, 25-anyos tungod sa qualified theft og Michael Hinampas, 42-anyos sa paglapas sa Revise Forestry Code of the Philippines.
Sumala pa sa regional director, magpadayon ang kapulisan sa pag-gukod sa mga wanted persons og segurohon ang kaluwasan og seguridad sa rehiyon.
Ang tanang nadakpang suspek, gidetine na sa nagkalain-laing police station diin sila na-aresto alang sa tukmang disposasyon.
