BUTUAN CITY – Gikakurat sa palasyo sa Malakanyang ang gika-ingong pagbiyahe matud pa sa mga vloggers nga supporters sa mga Duterte padulong sa China alang sa usa ka sponsored seminar.
Sa eksklusibong pakighinabi sa Bombo Radyo Philippines, gipadayag ni Palace Press Officer Claire Castro nga gihulatan na lang nila ang mga posts sa gika-ingong mga piniling vloggers.
Wala matud pa’y aksyon nga himuon niini ang gobyerno tungod kay pribadong lakaw man kini gawas na lang kung duna’y himuong lakang ang mga vloggers nga makadaut matud pa sa imahe sa gobyerno ilabina ang gikabalak-an karon nga pagkaylap matud pa sa mga fake news.
Aron hingpit nga mabatukan ang mukaylap na nga mga fake news nga nagdaut matud pa sa imahe sa gobyerno sa nasud ilabina kang Pangulong Ferdinand ‘Bongbong’ Marcos, gipadayag ni Usec Castro nga duna na’y gihan-ay nga mga programa ang Presidential Communications Office kon PCO.
Apil na niini ang pagpirmahay nila og Memorandum of Agreement kon MOA tali sa Department of Information and Communications Technology kon DICT, sa National Bureau of Investigation kon NBI, sa Philippine National Police kon PNP ug uban pa.
