BUTUAN CITY – Midistansya ang Malacañang sa pamahayag sa National Unity Party (NUP) nga posibleng dili paboran sa ilang mga kongresista ang impeachment complaint batuk kang Vice President Sara Duterte sa Kamara.
Una nang gipahayag ni NUP President Ronaldo Puno nga kung dili maka-prisinta og mga bag-ong ebidensya gikan sa upat ka impeachment complaint dili nila kini suportahan.
Sigon ni Palace Press Officer ug Communications Usec. Atty. Claire Castro, dunay katungod usab ang mga kongresistang mipili og magdesisyon, tungod kay dili man sila sakop ni Pangulong Ferdinand Marcos, Jr. ug sa administrasyon.
Kung kini matud pa ang makita nilang maayong hinungdan para sa interes sa ilang partido, mamahimo silang mag-desisyon para sa ilang kaugalingon.
Sa pangutana usab kung nagsalig pa gihapon ang Pangulo kung dunay igong ihap pa gihapon sa Kongreso ang iyang mga kaalyado, tubag ni Castro, mibase ang Pangulo sa tukmang proseso ug ebidensya.
Bisan paman niini, naglaum pa gihapon ang Malakanyang nga iduso sa mga kongresista kung unsa man ang mga ebidensya nga ilang makita sa imbestigasyon sa impeachment case ni VP Sara.
