BUTUAN CITY – Hugot nga gihimakak sa Malakanyang ang alegasyon ni kanhe Pangulong Rodrigo Duterte nga gikawat ug gibaligya na ni Pangulong Ferdinand Marcos jr ang gold reserves sa nasud.
Sa press briefing sa Malakanyang, gitumbok ni Presidential Communications Office USec ug Palace Press Officer Atty Claire Castro nga ang Bangko Sentral ng Pilipinas ang bugtong nag-atiman sa gold reserves sa Pilipinas, og bisan kanus-a wala kini gihilabtan sa pangulo.
Sigon ni Castro nga daw walay nagtambag kang kanhe Pangulong Duterte nga regular activities sa BSP ang pagbaligya og gold reserves aron makatubag sa exchange requirement sa Pilipinas.
Base na usab sa pamahayag sa Bangko Sentral ng Pilipinas, kabahin sa ilang mandato nga dili dapat mohawid og sobra sobrang bulawan rasong dunay higayon nga dapat kining ibaligya kung taas ang presyo niini.
Kamatooran niini, niadtong 2024 milansang pa sa 106.3 bilyones dolyares ang gross international reserved (GIR) sa Pilipinas, gikan sa 103.8 bilyones dolyares niadtong 2023.
Sigon ni Castro, October 2024 pa natubag ang maong alegasyon sa kanhe pangulo, rasong wala nila nasabtan kung nganung gibalik-balik kini pag-utingkay ni Duterte.
Nagtoo si Usec Castro, nga bag-ong pasi-aw o campaign promise na usab sa kanhe pangulo ang mga sama niining pamahayag.
Pagseguro ni Castro nga dili pasagdan sa gobyerno nga magpadayon sa pagkuyanap sa mga sayup nga impormasyon ang kampo ni Duterte rasong seryosong tubagon kini sa Malakayang ang mga susama niining pamahayag, aron mapaabot sa publiko kung unsa ang tinood og saktong impormasyon.
