BUTUAN CITY – Gikalipay sa Makabayan Coalition ang pag-apruba na sa kamara sa ikatulo ug katapusang pagbasa sa Divorce Bill ilabina nga usa sila sa mga authors niini nga pila ka tuig nang natanggong sa Kongreso.
Sa eksklusibong pakighinabi sa Bombo Radyo Butuan, gibutyag ni Alliance of Concerned Teachers kon ACT Partylist Rep. France Castro nga usa kini sa mga opsyon sa mga magti-ayong dili na malipayon sa ilang kaminyuon hinungdan nga dili na functional ang ilang pamilya tungod sa toxic nga pagpuyo.
Gawas pa, mas barato usab kini kumpara sa annument nga paagi sa pagpawala’y bili sa kaminyuon.
Dugang pa sa kongresista, dili basta-bastang maka-avail sa divorce ang magti-ayon sama sa gitu-uhan sa kadaghanan sa mga supak niini gawas lang og dayag na ang pagpang-harass, pagpanakit ug pagpangabuso.
Duna matud pa’y ipatumang unom ka buwang cooling-off period alang nidtong magti-ayong wala makasinati og pagpanakit sa usa’g usa aron mag-istorya, magiyahan sa ilang buhaton ug mapa-ilalom sa counseling.
Unod sa maong balaudnon ang mas baratong paagi sa pag-avail niini higayong hingpit nang mahimong balaud.
Kini aron mapaboran ang kababayen-ang nakasinati og pagpangabusong pisikal sulod sa ilang pinuy-anan.
Apan giklaro sa kongresista nga dili lang kini pabor sa kababayen-an kondili apil na sa kalalakin-an nga gi-abuso usab sa ilang kapikas sa kinabuhi.
