BUTUAN CITY – Hugot nga gilimod ni kanhe ACT Teachers Party-List Rep. France Castro ang pasangil nga siya matud pa midawat sa minaletang kwarta gikan kang kanhe Cong. Zaldy Co.
Sigon ni Castro nga kini usa ka “orchestrated scheme sa mga Duterte supporters” nga tumong nga ilihis ang atensyon sa publiko gikan sa mga kasong giatubang ni kanhe Pangulong Rodrigo Duterte sa International Criminal Court (ICC) ug sa mga panawagang impeachment batuk kang Vice President Sara Duterte.
Gitumbok ni Castro nga organisadong taktika lang ang mga mikaylap nga alegasyon, nga sama sa mga naunang harassment cases nga gipasaka batuk kanya.
Niadtong nakalabay nga tuig, gibutyag usab ni Castro nga ang Duterte political dynasty ang anaa sa likod sa mga contrived ethics complaints batuk kanya, isip pamaagi aron tabunan ang matud pa kahiwian ug pag-abuso sa confidential ug intelligence funds (CIF).
Dugang pa niini nga klarong gigamit ang mga susamang akusasyon aron daoton ang mga kritiko sa administrasyon ug pahagbaon ang Makabayan bloc.
Bisan paman niini, gibarugan ni Castro nga padayon niyang iasdang ang transparency ug accountability sa gobyerno ilabina sa paggamit sa pondo para sa mga proyektong imprastruktura ug serbisyong pangkatilibang.
Sa kasamtangan, init pa gihapong gihisgutan sa Kongreso ug sa publiko ang gibansagang maleta scandal diin pipila ka kanhe sundalo ang nag-ingong nakasaksi sila sa matud pa paghatod sa kickbacks gikan sa flood control projects.
Apan alang kang Castro, tataw nga kini kabahin sa mas lapad nga kampanya sa pagpangdaot batuk sa mga progresibong magbabalaod.
