BUTUAN CITY – Gihikay na ang mga kasong pagsupak sa Art II Sections 6, 11 og 12 sa RA 9165 batuk sa magtutungha nga nakuhaan og shabu atol sa operisyon alas 10:55 sa nakalabay nga gabii sa may P-2 Brgy. 12, Cabadbaran City, Agusan del Norte.
Ang mga personahe sa Cabadbaran City Police Station nagpatuman sa kampanya kontra ilegal nga drugas pinaagi sa Search Warrant Number 2072-2020 nga gi-isyu ni Hon. Judge Emmanuel E Escatron, Presiding Judge sa RTC Branch 2, Libertad, Butuan City nga pinitsahan niadtong Pebrero 11, 2020.
Nasikop niini ang suspetsadong si Jonathan Cailing Sarusad alyas Gio, 23-anyos, olitawo, magtutungha, residente sa maong dapit og nalista isip Top High Value Target Personality sa Regional Level og Top one sa Agusan Del norte Provincial Level.
Nakuhaan kini og tulo ka dagkong heat sealed transparent plastic sachets nga dunay sulod sa gitoohang“shabu”, og laing 11 ka dagkong transparent plastic sachets nga dunay sulod sa susamang epektos diin sa katibuk-an mitimbang kini sa 8.5 gramos diin ang DDB value muabot sa 100,300.00 pesos. Lakip usab ang nakumpiska ang nagkadaiyang ilegal drug paraphernalias.
Ang nasangpit nga search and seizure operation gisaksihan nila Barangay Councilors sa Brgy. 12 Hon. Karl Vincent Villanueva og Hon. Orlando Jongko, Media Representative og Katrina Palma-Gil ang DOJ representative.
