BUTUAN CITY – Nanawagan na kang Pangulong Rodrigo Duterte ang magti-ayong taga-Brgy. New Salem, Bayugan City lalawigan sa Agusan del Sur pinaagi sa pagdangop dinhi sa Bombo Radyo Butuan.
Kini aron ilang makuha ang 105-mil pesos nga kwartang ilang gi-invest sa investment scheme nga Asia.
Sigon sa ginang nga gitago lang sa pangalang Clara, 25-mil pesos ang gi-pay in nila sa iyang bana ngadto sa Asia Business Corporation RD Flex Trading niadtong Mayo 24 bugti sa saad nga kada-semana nilang makuha ang bahinong capital sa ilang kwarta uban sa 125-porsientong interest kada-semana.
Gawas sa ilang 25-mil pesos nga na-invest, sila usab ang mitapal sa walo nila ka mga silingan nga gipa-pay in nila og tag-dies mil pesos.
Sigon ni Clara, naka-payout lang sila og ka-usa niadtong Mayo 31 kondiin ang ilang nakuhang kwarta, ila usab nga gi-pay in ngadto sa Forex Trading.
Nanawagan siya kang Pangulong Duterte aron tabangan sila og ang ilang mga silingan nga makuha ang ilang kwartra tungod kay inutang ang dakong bahin niini, gawas pa sa gibaligya nilang mga binuhing kahayupan sama sa kabaw, baka, kanding, baboy og uban pa.
Kinahanglan matud pang makuha niya ang kwarta tungod kay masakiton na ang iyang bana og gamiton niya kini pagpatambal unta sa iyang bana.
