BUTUAN CITY – Gila-umang duna’y matalang damyos human gitay-og sa magnitude 76.1 nga linog kaganinang alas-7:07 sa buntag ang Sarangani Island, lungsod sa Sarangani, Davao Occidental.
Sa gipagawas nga earthquake bulletin sa Philippine Institute of Volcanology and Seismology kon PhiVolcs, natala ang epicenter sa linog sa 98-kolimetros sa sidlakang bahin sa nasangpit nga isla kansa tectonic ang gigikanan ug duna’y giladmong 10-kilometros.
Tungod niini, nabati ang intensity V nga pagtay-og sa lungsod sa Malungon lalawigan sa Sarangani samtang intensity IV usab sa lungsod sa Kiamba, sa susamang lalawigan apil na sa General Santos City ug sa South Cotabato.
Intensity III usab ang mitay-og sa Magsaysay sakop sa Davao de Oro, apil na sa Gingoog City sa Misamis Oriental; mga lungsod sa Maasim, Glan, ug Maitum sa Sarangani province, apil na sa mga lungsod sa T’Boli, Suralla, Banga, ug Koronadal City sa South Cotabato ingon man sa lungsod sa Lambayong sa Sultan Kudarat.
Intensity II usab sa lungsod sa San Fernando sa lalawigan sa Bukidnon; Balingasag sa Misamis Oriental; mga lungsod sa Norala ug Santo Niño sa South Cotabato; President Quirino, Esperanza, Columbio ug Bagumbayan sa Sultan Kudarat apil na sa Bislig City sa Surigao del Sur.
Intensity 1 usab ang natala sa Cabadbaran City sa Agusan del Norte; Kalilangan sa Bukidnon; mga lungsod sa Carmen ug Banisilan sa Cotabato; Cagayan de Oro City sa Misamis Oriental; Isulan sa Sulan Kudarat; ug Zamboanga City sa Zamboanga del Sur.
