BUTUAN CITY – Wala’y natalang mga damyos sa mga lugar nga gitay-og sa magnitude 5.1 nga linog nga mi-igo sa probinsya Surigao del Sur pasado alas 3:14 kagahapon sa hapon.
Sa earthquake information No.3 sa Philippine Institute of Volcanology and Seismology kon PHIVOLCS, mi-igo ang linog sa sidlakang bahin sa lungsod sa Bayabas nga duna’y giladmong 40-kilometros ug tectonic in origin.
Nabati ang maong pagtay-og sa mga kasikbit nga lungsod, syudad ug rehiyon diin intensity IV didto sa mga lungsod sa, Marihatag, San Agustin, Tandag City ug Hinatuan, Surigao del Sur samtang intensity III sa Bislig City ug Tago, Surigao del Sur; Dapa, Surigao del Norte; Gingoog City ug Magsaysay sa Misamis Oriental ingon man sa Butuan City sa Agusan del Norte.
Samtang Intensity II usab ang nabati sa San Francisco, Southern Leyte; Cagayan de Oro City, Balingasag ug Villanueva sa Misamis Oriental samtang Intensity I sa Surigao City ug lungsod sa Mainit, Surigao del Norte.
Samtang sa instrumental intensities usab, natala ang intensity II sa Surigao City; Gingoog City, Misamis Oriental; Abuyog, Leyte; Bislig City ug Intensity I sa Cagayan de Oro City.
Ubay-ubay na nga mga aftershocks ang natala sa Phivolcs human ang maong linog.
